Saturday, 17 November 2018 - Sat 11 17 2018

منو

تجويد قرآن ابتدائي

پالڻهار هن سنسار جي جوڙ جوڙي ۽ انسان کي عقل جهڙي نعمت عطا ڪري اشرف المخلوقات بڻايو ۽ ان جي هدايت جو به نبين سڳورن(ع) ۽ آسماني ڪتابن وسيلي بندوبست، پاڻ ڪيائين. نبين(ع) ۾ آخري نبي، حضرت محمد مصطفى(ص) ۽ ان تي نازل ٿيل پاڪ ڪتاب، قرآن شريف آهي. پاڻ سڳورن(ص) جو مشهور فرمان آهي ته:

إِنِّي تَارِكٌ فِيكُمُ الثَّقَلَيْنِ كِتَابَ اللَّهِ وَ عِتْرَتِي أَهْلَ بَيْتِي ما إِنْ تَمَسَّكْتُمْ بِهِمَا لَنْ تَضِلُّوا أَبَداً [1]

”آئون توهان ۾ ٻه وزني(قيمتي) شيون، الله جو ڪتاب ۽ پنهنجي اهلبيت(ع) ڇڏي رهيو آهيان جيستائين انهن ٻنهي سان واڳيل هوندؤ ڪڏهن به گمراھ نه ٿيندؤ“

 

هن حديث پاڪ مان سُڌ پوي ٿي ته رسول پاڪ(ص) جي ظاهري حياتيءَ کان پوءِ جنهن به قرآن ۽ اهلبيت(ع) سان پنهنجو ناتو جوڙي رکيو اهو گمراھ نه آهي باقي جنهن به انهن ٻنهي کي ڇڏيو يا ٻنهي مان هڪ کي ورتو ۽ ٻئي کي ڇڏيو ته اهو گمراھ آهي ڇو جو حديث ۾ ٻنهي سان رابطو رکڻ وارو گمراهيءَ کان آجو آهي باقي ٻيا سڀ گمراهيءَ جي اونداهيءَ ۾ ڦاٿيل آهن. افسوس سان چوڻو پوي ٿو ته ڪن اهلبيت(ع) کي ڇڏي فقط قرآن کي ورتو ۽ ڪن وري قرآن کي ڇڏي فقط اهلبيت(ع) جو دامن جليو ۽ عملي طور قرآن کان گھڻو پري رهڻ لڳا.

ڏٺو وڃي ته اسان جي سنڌ ۾ قرآن جو احترام ته تمام گھڻو ڪيو وڃي ٿو ايتري قدر جو ان کي پوتيءَ کان سواءِ رکيو به نه ٿو وڃي ۽ هر جمعي يا سڳوري ڏينهن ان جي پاسي ۾ اگربتيون ٻارڻ ۽ دعا گھرڻ کي وساريو نه ٿو وڃي، پر ان کي اڪثر ماڻهو پڙهندا نه آهن جڏهن ته تاتڻهار قرآن کي ان لاءِ نازل ڪيو ته انسان ان کي پڙهي هدايت پِرائي ۽ ڪمال جي درجي کي حاصل ڪري. اهو به وائکو ڪندا هلون ته جيڪي مومنَ قرآن کي پڙهندا آهن انهن مان به اڪثر ان کي سنڌي اُچارن ۽ سنڌي لهجي ۾ پڙهندا آهن.

جڏهن ته قرآن عربي زبان ۾ آهي ۽ ان کي عربي مخرجن ۽ لهجي ۾ پڙهڻ گھرجي جيئن رسول پاڪ جي حديث آهي ته :

اِقۡرَءُوا الۡقُرۡاٰنَ بِلُحُونِ الۡعَرَبِ و اَصۡواتِها... [2]

يعني: (قرآن کي عربن جي لهجن ۽ آوازن ۾ تلاوت ڪريو.)

جيئن ته سنڌي زبان ۾ قرآن جي تجويد بابت لکيل ڪتاب، اڻ لڀ آهن يا اهڙا مُجھيل لکيل آهن جو شروعاتي تجويد سکڻ وارو پريشان ٿيو وڃي . اسان هن ضرورت کي محسوس ڪندي پاڻ تي لازم سمجھيو ته سنڌي زبان ۾ شروعاتي تجويد لاءِ هڪ اهڙو ڪتاب لکيو وڃي جيڪو آسان ۽ سولي سنڌيءَ ۾ هجي ته جيئن اسان جا سنڌي مومنَ ڀائر ان منجھان پورو پورو لاڀ حاصل ڪن. ڪريم جا ڪروڙين ڪرم جنهن توفيق ڏني جو هي ڪتاب جيڪو فارسي ڪتاب ”حلية القرآن“ جو ترجمو آهي، ان کي ڪجھ وضاحت سان  مومنن جي سامهون پيش ڪري رهيا آهيون. اميد آهي ته هي ڪتاب قرآني تجويد جي واٽ جي شروعاتي پانڌيئڙن لاءِ تمام گھڻو مفيد ثابت ٿيندو.

جيئن ته ”موسسه نور القرآن “ جي اهم مقصدن منجهان هڪ مقصد اهو آهي ته اسلامي ڪتابن کي سنڌي زبان ۾ مومنن تائين پهچايو وڃي. ان هدف کي نظر ۾ رکندي هن اداري پاران هي ڇهون ڪتاب جيڪو قرآن پاڪ جي تعليم تي مشتمل آهي، سنڌي مؤمنن جي بارگاھ ۾ پيش ڪجي ٿو. اميد آهي ته رب پاڪ اسان جي هيءَ ننڍڙي ڪاوش پنهنجي درٻار ۾ قبول ڪندو.

والسلام

مداح حسين مخلصي (رند)

چيئرمين مؤسسه نورالقرآن سنڌ پاڪستان

هن ڪتاب کي ڊائونلوڊ ڪرڻ لاءِ هيٺ ڏنل لنڪ تي ڪلڪ ڪندا.

 

[1] . مستدرڪ الوسائل، ج11، ص 372 .

[2] . الڪافي _ ج2 _ ص 614

اسان مفيد راين جا منتظر آهيون.

0
تي پابند آهيان.
  • بغير راءِ جي